1984 (suterot)

Teliz mal Wikipedia.
1984

1984 tir trakopaf is abditrakus berpot sanegayan bak 1949 lize Orwell va eemevafa is torkarotifa tamava zovdar lize ana rietoda va olkik al xultur.

Rupa

Rupa koe London bak 1984 dilizer. Tamava tir dem baroya tawavagaderopafa belcapa gejusa : Eurasia is Estasia is Oceania. Sina kotote tid eemevafa ise gan doevafo pako zo gaded, i gan pako tition tiyiso askisik va tunuyara va dodelikeem. Nelkaf koredik Winston Smith dene AgEld ( Elda ta Ageltuca, englavon Minitrue ika Ministry of Truth ) kobar, lize va izva fabdur enide ina va siatos ke Pako di vadjer. Smith kle tir koredik gwidaf gu nubokera skuna gan Pako voxe va trakula palser.

Smith va anamef selt pimtar : tujadiana rankera, is meura va ikra is kota pestarotiinda, is ardial va trak is ava, is moekote kalenintera ke Big Brother ( kotavon Taneafe Berikye ) wanuyas bolk, va olkik cugeke ablesid ise tuantad. Voxen kakevera va Julia yikya jupar da Winston va loveem ke Pako di kaikonar : sin renarud ise va kevmadara ke sanelia klokad. Relmeyen gan tan « nik » ( O’Brien ), zo soped aze zo naked nume zo dimraved. Cenera ke Pako va Smith tir kotafa larde va Julia tere kaagder.

Orka

1984 gu suteks ke Yevgeni Zamyatin rossiaf suterotik vergumvelton gu Cin ( rossiavon Мы ) sanegayan bak 1920 va int koswar. Ban berpot va eemevafa rietunacaja dere pimtar.

Ton wadja va witafa evayuca is trakopaf reiz icde ana rotafa XX-eafa decemda, eemeva ke Orwell gu Soviet bolk afton zo koswar, i gu blok dem tanafo Pako, is dem adomtas okilik kottode atayen, is dem kokavertuma, is dem dojera va rotieem is bartandaf azed ta warzera, is dem isteresa sayakeva, is dem ingoy is « mivokafa » exaksara, is dem kerematc, is dem adja, is dem dimraveso pemaxo, is dem sanegafa movura ton « Moskva ask », is dem gulafa finta. Va beitura bas Nazi eva is Stalin eva is torkeva dere rowit.

Drunara va berpot

1984 tir gaderopaf berpot vodjun kev doevafa vertuma vanblisa titi 1950-e sanda, mu belisikeem ke Talteka.

Koe 1984, Orwell va belikaf eemevaf selt mallinger, i va ana gestina kalskura va witafa bowera. Vergumvelt ke berpot bazer da Orwell va izvafa rotisaca ke vantukesa kruldera va mana tamava guzekar.

Brube gu leca ke gaderopafa felira zo krupter, tulon zanon gu swavopafa nubokera. Big Brother va kota mona isu kraba kostir : sanegaf poz isu yasegaf batkane zo jead. Kot rumeik ta toidera is rankera va gadikeem zo sovarter isen ikruca zo rujar kiren jugemera bevular vrutara va olkuca. Valey swavafa nubokera, Pako va altokafa kalstujera va sanelia ksuber : dace beta lesayafa waeska va sopera ronekir. Kot korik va ciondasa kobara skur numen kotafa sanelia ton kunca zo nubegar nume dun kalveger. Nakera dere tir gubefa ksubera, ton sugda bazesa da alto gan Pako zo digir. Milinde izva zo kalstujer larde Pako va savseluxaxa dimsuter.

Zoltera : terigesa eemeva ke minaf selt

1984 kle tir berpot dem denaf trakopaf cek : inyona watsa ( detceikuca, is soka, is tikira ke saneguca gu yasegusa, is jugemera, is kanaceem, ikz- ) zo suled enide ayik ke 1949 va wupe is rotisaceem ke vertuma di under, i ke sanerotifa vertuma igelton rovanfisa va eemeva.

Dere rupel

1984
XANTO
Vergumvelt Nineteen Eighty-Four
Sutesik George Orwell
Ava Englava
Suterotinda Berpot
Evla 1949
betara teza
  Tuveli icde Suteroteem 
1984, moek ke tan englavaf piskuks