Youtube

Teliz mal Wikipedia.

Youtube tir Internet gortaf debak ta jandera va mamewavaxa ise nover da va sina favesik rodisuked ise rosebud ise rogunested ise rowalzilid. In gan Steve Chen is Chad Hurley is Jawed Karim, i gan 3 savsaf unenik ke Paypal dodesiko, al zo redur bak toleaksat ke 2005. In gan Google zolosta bak saneaksat ke 2006 al zo luster vas felem-tev-decem-alub-san-celemoy (1 650 000 000) Dollar talolk. Zana tigir koe San Bruno dota, i koe California soka.

Bak 2009, mon 350 000 000 ayik va debak aksateon worad. Mali 28/10/2010, rodayeem ke Youtube va felemoy duulenik dikir. Bak 2018, kotaksaton, loon felem-lerd-decem-celemoy favesik va Youtube faveyed. PewDiePie tir tel lodisuken roday : 20 800 000 000 wiraki. Bat roday dere tir tel dikis va tel loon duulenik : 92 000 000. Mamewavaxa ke Despacito lexa ke Luis Fonsi tir tela lodisukena : loon tev-felemoyi wiraki bak bareaksat ke 2019.


ATOERA[betara | va krent betá]

Loa koefa mamewavaxa isu roday zo rodisuker gan kot favesik, solve anton vertokanik va mamewavaxa kimiskon rosanegad. Mamewavaxa zo rovansad vey loma is kan remravlem ise zo rodivbured ko pilkaf debak. Kot vertokanik va sebuks rosanegar ise va mamewavaxa volaun rogunester.

Viele kontan va mamewavaxa disuker, bam ara skedana mamewavaxa roneon dragewed koe xufo faruraxo, tuke vergumvelt is remravlem dositas va mamewavaxa. Arti tanda kaiki tugeltrawera ke tel debak, warzafi fli toz kruldeyed : tula rosanegara va mamewavaxa dulzesa pu ara mamewavaxa, is roduulera va int ta kazawara va warzafa tana icde pilkovafa watsa. Bati fli al noved da yon vertokanik di tukotgrupaweyed : tula Tay Zonday is Smosh is Epic Meal Time is PewDiePie is kot zavzaks. Ede doda ke Youtube malyer da va jotik mamewavaxa me katir, pune Youtube pu favesik roterur da in pilkomar ta wazdera da gijepaf ta rowira va tela mamewavaxa.