Turkafe kolavaxe (trutca ke Ingres)

Teliz mal Wikipedia.
Turkafe kolavaxe ~ Le Bain turc (FR)


Turkafe kolavaxe ( francavon Le Bain turc ) tir trutca anamkafa vas 108 cm-, i puntalingeks keve inta skuyun gan Jean-Auguste-Dominique Ingres francaf lingesik bak 1862. Koe Louvre tcilaxe ke Paris re tigir.

Tici blira, Ingres va tela loon ikrarenafa trutca ke intaf grabomeem redur, i va harem nakila gesiasa va watsa va lebaca gu watsa va Roneka. Gu yona twa ke Montagu Lady ( 1690-1760 ) negasi va worara va ayikyafe kolavaxe koe Istanbul tozi XVIII-eafa decemda, va int koswavar. Ta bata ponara lize regvel gazad, Ingres va vola ixam tigisa koe yona direfa trutca gire faver. Bat bocaf grot ke yambik vamoi inafa awalkera pu saneg anton zo razdayar.

Klokana Roneka[betara | va krent betá]

Konaka sanoya turkikya ton gedrafa tila moe darvawa koe ronekaf koak aname drimula debanyed. Konaka kolavasikya nemon div lava altosotced oke liuged. Ara pulvidad ise va fada ulid. Koe ludev kona stuter, kabdueon ara geon wiyina kan teca kinga lexur. To gan santara ke tana ayikya va mou ke vegungik, ikrarenuca ke trutca moekote zo kir.

Bata trutca ke 1862 va watsa va lebaca gu watsa va Roneka kle gesiar, i va toloya watsa karolana gan lingesik mali alubda. Sina ixam tiyid xanta ke konak grot ( tulon Ketalevetiryanya ), voxen to arti blira Ingres va loon ikrarenafa trutca ke grabomeem skur.

Turestara ke suterotafa ewava[betara | va krent betá]

Voldum Delacroix, ko Roneka meviele lapiyir : va bata coyunta nope belira is wira va gretcaks klokayar. Ta lingera va Turkafe kolavaxe, gu twa ke englafa Mary Wortley Montagu pintapason negasi va worara va kolavaxe mu ant ayikya koe Istanbul, va int koswavayar.

Bak 1825 va ki ke Yona twa male Turka ( englavon Turkish Letters ) ke Lady Mary Montagu, i va ki vergumveltkirafi gu Pimtara va kolavara ke ayikya ke Edirne ksudar. Bantanya va kurenik englaf permik koe Turkafo gindaxo bak 1716 dositayar. Wali 1763 is 1857, twa ke Lady Montagu koe Franca anyuston zo sanegayad ise va ronekafamafa voza sinkayad. « Cwe tol-decemoya ayikya tigiyid », koe kuparki ksudayani gan Ingres Lady Montagu bazer. « Lebafa listikya ton gedrafa tila... konaka ginelad, konaka viunsud, dere konakara va fada ulid oke va opray grivuted, ise jontika grutcion senyed edje gan levetirikya ton zo ukukotad, i gan sanperdaf ok sananyustdaf felbes yik ».

Bocaf grot[betara | va krent betá]

To Napoléon sersik va bata harem nakila pu Ingres moni 1848 jafayar. Grabom bak 1859 zo bildeyer voxen waroldon zo dimbildeyer kiren va gindikya al lemisteyer. Lingesik va trutca kali 1863 gin kobaveyer.

Bat lingeks pu saneg bak 1905 oxam tere zo razdayar, bal Setikesa Konedira va Ingres bifon gu Bontay ke Muvugal. Va lotuwarzas lingesik don Picasso bam tuseramayar. Grot ke guazugal ke Ingres, bata trutca en tir pirtafa gu detce lidam tazuk.

Xult ke regvel[betara | va krent betá]

Turkafe kolavaxe tir jupekara va lingeropafa aneyara ke Ingres is vixara va zovdaks skuyun watson gu turkafa kolavasikya isu lingeks mali 1807. In va vola ke yona abdifa trutca tire ginur, i va tulon Turkafe kolavaxe vas ewava gon wina, num re kabdueon rundana is gina va stalta.

Meka lebaca male blis tezik zo skuyur. Bat ponaks va voleem ton toloyi kipi koe ilsuyafa vox metentuna darka belcer. Vanmiae bati kabduefi ki, kliera ke regvel stale gaberopafa tageltuca is ilsuyafa keska gazar. Soe tamapa va ponaks divfir, tulon xuta gu livaceem ke lingeks zo dolantiyir. Ingres va tondo limega dum ke lanyona trutca ke Raffaello (« tec lorik sedme int ») al narar. Va fentafi is flanceni afi gu trutca dere al getcar, numen batcoba va tezodaks ke voleem tuaxar ise jupekar da conya vamoer.

Dere rupec[betara | va krent betá]

Trutceem ke Ingres

Stragela[betara | va krent betá]

  • Robert Rosenblum, Ingres, Paris, Cercle d'art, 1968, p. 170-172.
  • Hélène Toussaint, Le Bain turc d'Ingres, catalogue d'exposition, Paris, Éd. Réunion des musées nationaux, 1971.
  • Alain Jaubert, Le Regard captif, in Palettes, Paris, Gallimard, 1998, p. 159-169.
  • Vincent Pomarède, Stéphane Guégan, Louis-Antoine Prat is Eric Bertin, Ingres, Gallimard - Musée du Louvre éd., Paris, 2006 ( estova ke wonara va Ingres atoeyena koe Louvre tcilaxe bak toleaksat ik alubeaksat ke 2006 ).
  • Rose-Marie Hagen isu Rainer, Les Dessous des chefs-d'œuvre, Taschen 2000, Cologne, p. 410-415.
  • Giovanna Magi, Il grand Louvre e il Museo d'Orsay, Bonechi, 1992, p. 50.
  • Gary Tinterow, Philip Conisbee, Portraits by Ingres: Image of an Epoch, Jean-Auguste-Dominique Ingres", Metropolitan Museum of Art, 1999, p. 372.

Turkafe kolavaxe
Le Bain turc

Turkafe kolavaxe
 Yambik Jean-Auguste-Dominique Ingres
 Evla 1862
 Ord Lebaca
 Lingerinda Puntalingeks keve inta
 Lum lim- 108 cm-
 Tigixo Louvre tcilaxe, Paris


Trutceem ke Ingres
Izvaf ok vundopaf lingeks

Napoléon moe gindaf uskejPaolo is FrancescaRaffaello is FornarinaZeus is Tetis

Delt

Caroline Murat gazikyaAmédée-David Pastoret biptikyeAugustine-Modeste-Hortense ReisetAyikye dem oblakakBelvèze-FoulonBetty RothschildBonald gertikBonaparteBroglie sersikyaCaroline RivièreDuvaucey W-yaFrançois-Marius GranetGonin WeltocyaHaussonville biptikyaJacques Marquet de Montbreton de NorvinsJacques-Louis LeblancJoseph Ingres, gadikye ke yambikNikolay Guryev biptikyePierre-François BernierTournon biptikyaZélie listya

Lebaca

Koblira ke VenusKolavasikya ke ValpinçonKolavasikya mialonTurkafe kolavaxe

Alkaf lingeks Turkafe kolavaxe
Mivdelt Turkafe kolavaxe
  Tuveli icde Lingeropa