Teza:Xadola/Nelkaf betakseem/03/2019

Koblira ke Venus ( francavon Vénus anadyomène ) tir trutca lumkirafa gu 163 × 92 cm-, i puntalingeks keve inta skuyun gan Jean-Auguste-Dominique Ingres francaf lingesik bak 1848. Koe Condé tcilaxe ke Chantilly re tigir.

Pimtara va grabom

Bat grabom va aluboy koredik keve taneaf azent atoer. Iste buneks, lebafa yikya moe batakaf skael ton gruticafa tila ranyer. Kan ronefa ma vamoe taka is taltefa nuba, va latkaf usukap usukotar. Pumkikam anameon ekeyud, tan va nuga kutcar, ar va bade kevlicar, bareaf va elza atoer, isen tere tel ironokaf va lavatisikya ileon lakisa moe birokol tcekar. Toleaf azent gan welfa is falte ke kelt zo kereler.

Detce ke grabom

Grabom va koblira ke Venus yunker. Venus sotir ellasafe Afrodite, i lorikya va Rena is Listuca. Vundafe nega bazer da viele Kronos va Uranos gadikye lorikye ke kelt tarleyer, pune va bantel di ikrezuuyur numen batcoba va bodaf skael kiyir. Venus kum bat skael kobliyir nume nazbeik ke Kelt is Bira.

Woyok ke buneks

Venus koe relidafa bunera zo kobuder. Bogruca gan zidaconya tigisa iste trutca is koonisa va vurko ke lorya is xuuca ke alto zo tupoar. Icde kafkara is zidaconya tigisa vwon ice fonta ke lorya, Ingres gan dalik ke Tolnazbalarugal zo koswavar. Inafa lewerkafa zatcarinda gu italiafa vuestera ant tuarar.