Oklucavla

Oklucavla tir nelkafa exaksara ke milikrafamuca is ke arayedura. Tore tiyir ta tulaviara va milikrafamik is arayedusik is ta kretura va nuyuca is miltuca ke gedrafa ikrafa vodjura isu pilkoma.

Oklucavla tulaviaweyer yoke muskatum ke Stonewall koe Amerikatanarasokeem bak 1969. Bifa ke oklucavla daletoe dilized koe jontika patecta ke tamava. Gubeon zo grustad moni teveaksat ke kota ilana kiren teveaksat tir aksat ke okluca.

Xanta[betara | va krent betá]

Ba mielcek ke 27^-e is 28^-e ke teveaksat ke 1969^-e va ji kolanisi va Stonewall Inn milikrafamikzazda ke New York widava koe Christopher Street nuda, lospa dem milikrafamikya is dem milikrafamikye is dem arayedusik tcumiveyer. Lyumara ke ji kev muska is ke tigisik kev ji lizukonayar bak konak vielcek. Muskatum ke Stonewall banvielu zo torigir gu greeltap icde askifoara mu miltuca ke rokeem wal arikrafamik is milikrafamik is arayedusik is milayedusik.

Balemoy aksat radimi muskatum, ba 02/11/1969, Craig Rodwell is intaf renanik, i Fred Sargeant, is Ellen Broidy is Linda Rhodes draged da farura zo grustar koe New York widava ta kimbara va « mivokafa exaksara ke Christopher Street nuda ». Tiavera zo skuyur koe Philadelphia widava bal kabelcara ke Eastern Regional Conference of Homophile Organizations (ERCHO), i grustara ke gedraf milikrafamucafamaf lizor. Bata tiavera tanboyon zo vanikatcur gan tigisik vaxe olkoy New York widavafa pakava Mattachine Society gesia kiren sin agied. Kadimi bata vanikatcura, sayudasik ke Chicago widava isu San Francisco isu Los Angeles va kimbara va muskatum ke Stonewall dere gorad.
Kabelcara ta egara va taneafa bifa ke oklucavla New York widavafa tozuwer runi taneaksat ke 1970^-e koe kraba ke Craig Rodwell, koe 350^-e ke Bleecker Street nuda. Paker Brenda Howard, i milikrafamafa is arikrafamafa sayudasikya grupen wetce « gadik ke okluca ». Bat bowesik va taneaf bartiv ke Gay Liberation Front lospeem is va Gay Activists Alliance va bifa dobenplekur.
Ba pereaviel 27/06/1970, taneafa bifa ke oklucavla dilizer koe Chicago widava azen ara koe San Francisco. Ba eldef viel, logijafa kabelcara dilizer koe New York (ton yolt : Christopher Street Liberation Day) is koe Los Angeles.
Koe Europa, taneafa bifa ke oklucavla dilizer ba 29/04/1972. Va ina 200 ayik paked koe Münster widava koe Germana.

Grustara[betara | va krent betá]

Jora[betara | va krent betá]

Jora fereon zo grustad aname exaksara : sielcek ik dolpa, bro tela ke Lady Gaga dankasik bal istayara va Europride bifa koe Roma widava bak 2011^-e ik bro disukexa ke Global Deejays lospa bak 2012 koe Marseille widava.

Koe tamava[betara | va krent betá]

Bifa ta oklucavla noelkeon krulded koe kota tamava. Neken sinafa divlaumara me milinde al zo skur koe koti tamavaki.

Koe lan patectoy, farura zo dilizeyer solve milikrafamuca wan tiyir fuga ise zo torigiyir vas swavafa akola : toda ke Amerikatanarasokeem is ke talteka ke Europa, tulon. Battode enid ke farura tiyir askira da puda ke ristan lek zo gildar. Farura tulon tiyir ta kretura da milikrafamuca mea zo ropursar. Viele bat kretuks al zo seotar, dalebam toleaf lizor nites vas aneyara va miltuca icde roka is vas lyumara kev milikrafamucafimuca toz rodilizer. Ar patectoy rontion ko toleafa nesida ke lizor al fid kiren taneafa nesida me zo roguzekayar kiren bowere me tiyir ton saneroti. Acum mematcaf ikrafamik ke ronefa Europa rotixaweyed anton radimi apudojara va doevafa elega. Bal bata apudojara, milikrafamucafimuca ixam zo ropursar. Bifeem ta oklucavla zo dobenplekur gan InterPride, i gesia reduyuna bak 1982^-e koe Boston widava. Koe inaf debak zo rotrasir bifevleem ke tamava.

Afrika[betara | va krent betá]

Abrotcion, tanaf afrikaf patectoy emudes va oklucavla tiyir Geeafrika : farura keskeon tandeon dilizer koe Johannesburg widava mali 1990^-e is koe Kaapstad widava mali 2001^-e. Bak 2006^-e, mon 5000 pakesik tiyid koe oklucavla ke Johannesburg.

Bak 2012^-e, oklucavla zo grustar koe Entebbe koe Uganda.

Bak 2018^-e, Swatinia is Kenya va oklucavla toz emuded.

Amerika[betara | va krent betá]

Amerikatanarasokeem is Kanada[betara | va krent betá]

Lizor al tozuwer koe Amerikatanarasokeem : mali 1970^-e, lan korik ke New York widava va kotgrupera va taneaf ilanuk ke exura ke Stonewallgorad. Nope taneask ke Gay Liberation Front lospeem gaden gan Craig Rodwell, ba 28/06/1970, 2000 korik va 6^-eafa ikpa wale Waverly Place is Central Park kenlanid. Exaksara zo yoltar gu « Christopher Street Liberation Parade » isen inafa winugafa adja tir « Com Out ! ». Ara farura dere dilizer koe San Francisco is Los Angeles is dace Toronto is Montréal is Ottawa koe Kanada.

Oklucavla ke New Orleans bak 2014^-e
Justin Trudeau, i taneaf eldik ke Kanada koe oklucavla ke Vancouver bak 2016^-e
Lincoln Center for the Performing Arts arayaxe koafine bal oklucavla ke New York bak teveaksat ke 2021^-e

Bak sanda mali 1970^-e, 2 solwif yolt zo faved koe Amerikatanarasokeem : koe New York is Atlanta, yoltat gu « Gay Liberation Marches » solve koe California, batyona bifa zo yoltad gu « Gay Freedom Marches ». Bak 1978^-e, koe San Francisco, tulaviawer ton taneafa toma korfif nilt, i warzafa leca ke doda ke milikrafamik. Bak sanda mali 1980^-e, va telyon taneaf grustasik ar sayudasik ledunged : yolt ke oklucavla, torigin gu slikafa kretura zo ikaplekud gu mialodafa tazukoyera, i « Gay Pride ». Farura vanpir lokapakorafa is loksevakirafa.

Koe Kanada, bak 1981^-e, bifa gundafa gu muskatum ke Stonewall lizukonar : ba 5^-e ke toleaksat, 304 korik zo soped koe gedrafe idulxe ke Toronto widava. Yolt ke walzenik zo sanegad ko feleem. Numen farura dilizer koe widava azen ba 28^-e ke teveaksat, taneafa bifa ke oklucavla ke tela widava dilizer.

Moni tena ke 199^-eafa sanda, xakuba va ikrakola toz rued. Kapava toz krulded. Lanyona jijad remi riwe perda. Xakuba nek zolonafa vanpir anton farura istayasa va bifa.

Bak sanda mali 1990^-e, miltuca wal milikrafamafa tolonga isu arikrafamafa tir nelkaf kretuks ke kapakorapafa farura. Jontika widava ke lentefa Amerika va milikrafamucafa farura iku kapava dadid.

Bak 2000^-e, Kanada va Amerikatanarasokeem walaskir vey kotrafa miltuca wal arikrafamik is milikrafamik kiren yerumara toz zo rictar do vanikatcura. Numen farura daletoe tir mu rena lodamu kretura.

Noelkeon, San Francisco Pride tir tela logijafa oklucavla ke Amerikatanarasokeem. Dilizer koe San Francisco widava.