Louis Antoine de Bougainville
|
Louis Antoine de Bougainville ( 1729-1811 ) ~ Francaf vestasik va Pacifika Welfa. Louis Antoine de Bougainville tiyir francaf kotgrupaf totasik bak toleafu acku ke 18-eafa decemda. Vestara va Polinesia is Melanesia. Koyara anam tamava[betara | va krent betá]Koyara anam tamava tir tece koyase pone suteyene gan Bougainville is kridjovese va inafa stuva anam poz. Bougainville wetce totas fayik ke francafa totervolia va bate pone remi brinuga vas loon barda wali 1766 is 1769 sutelar, i remi brinuga moe toloya tota yoltkirafa gu Boudeuse isu Étoile. Kosmatason va tamava mallapiyir, bristunon gan Louis XV gazik is Choiseul daleldik. Bata stuva dere tiyir opafa brinuga. Jontik opaf korobik moe tota rundanyayad : altelopik voxis kocopik is ruxopik, ta malburera va ra ke tuwava megrupena koe Franca. Jontika kosmara remi XVIII-eafa decemda zo skuyud, novenon gan tota kestolafa is septafa loon dam daredecemdon. Nega ke vestasik, kore riwe vieleon zo sutelayar, pune tir ton neva dem luzeem. Bougainville va artlapira ko boniaxo ke espanafo gazaxo ke geefa Amerika tulon pimtar. Aname yona ewala ke Kariba bira voxis logijafa patecta dum Argentina kal geexo ke Amerika van nael koyar. Totara wal Atlantika is Pacifika dilizer aze van Asia vodjur. Taneaf luz tid teca kimbara va kosmareem ke europafa patecta ko yona amidafa welfa. Bougainville va xialara pebur : va geltrevafa is pimtasa neva rozanudasa va opik voxis totasik djusutelar. Va Malvinas tursia pulvir, i va tursia co djuboniayana vox kretuna gan Espana. Banliz taneon soktar edje toleafa tota kene Franca wan tigir. Azon soktara koe Buenos Aires dilizer lize Bougainville va artlapira ke bana Étoile tota goker. Koe diref luz, koe Montevideo koe Uruguaya va aloyara va Jesus alkaveem gan volmiv gazik ke Espana tigison tcoker. Malyedar da ban veemik va intafa vuidara al kotaskickiyid larde va mivirubikeem ke boniaxo lajudeweldeyed. Sutesik azon izvon kimbar, pebutuson va inafa tigira koe gola ise va tuseltasa adala ke europaf patecteem malyopar. Toloya belcafa tota van Magalhães vedil azon lapid, az Patagonia tici 1767. Bougainville va lana nuca tove batyone sane nedir ise va sinafa opeluca karolar. Va sinafa altokuca isu luveduca dere sisker, Patagon tis yolt ke vundaf gulik gaayan gan Magalhães. Sinaf selt zo pofenyer ise tir miltevackaf. Wori va Pêcherais sane vol albar, i lane sane dere irubase koe batyona gola vox tise ton lefu tipu isu grustara kapbure Patagon sane. Buluson va ewala ke bat vedil, Bougainville va Lanciers yoltana ewala azu Harpe kosmar. Va tuwava is listuca ke ruxeem voxis luveduca ke irubas saneeem. Koyara zo wanur numazen va Tahiti artlapid lize zo emudenyed kore vabdion moe sinafa tota vols siday mielon gosoked. Bata ewala duvuna gu « Matela ke Eden » gan Bougainville, va intyona miduks is tuwava firvir. Va pomara ta gabera va aal ikaon firvir ise va abic tawamidus stravok pu mivirubik karolas taver. Diref teliz tid dem abrotcifa mafelasa pimtara ke sutesik va ewala is lidawicka voxis karolapane sane, i va votcukaf jotik is ayikya is dace guazaf utcorik. Va Tahiti worar ise va inaf selt tuke Aotoutou kouon kosmar, i tuke Aotoutou zanudasu va nyapesik is divnedisu va ageltucafa blira ke ewalikeem num tuspupiamasu va torefa klokesa rieta ke Bougainville. Aotoutou ko Franca do Bougainville di lapir. Radimion francafa tota van New Britain ewala mallapid. Irubasikeem ke bana ewala zo pimtar da sotir almebeltaf dem altokaf kor pokef gu telyon ke afrikafe sane. Va krimta ke Niuginia azon kenelapid. Bougainville pebur da drig ke tota ve akoled, nope tulon brayakola. Konaktan bal koyara mulufted voxen adim ayafa tazdara me tir egale kapbure yona manara koyara. Tota koe Solomona tursia azon soktad lize xollandafo boniaxo tigid. Drig griakoled, lokiewapon estuson isu ulison. Ko Batavia koe Java ewala soktad, i koe widava dem jontika tapega kore selt tir volmiltapaf. Ironokaf teliz va tena ke anamkoyara is mallapira va Mauritia ewala pimtar. Azon van Franca dimon vanlapid. Boudeuse tota ko Saint-Malo ba 16/03/1769 artlapir isen Étoile tota ko Rochefort widava ba 24/04/1769 luxeon artlapir. |
