Liwot va Vilnius (Civitatis orbis terrarum)

Liwot va Vilnius ~ Civitatis orbis terrarum liwotak, 1581

Vilnius tir widava ke Lietuva. Klita ke bat liwot tir megrupena.

Remi konaka decemda, Vilnius va kuksa is gamdasa savsavafa kazasa vawa wale ronexo is taltexo stujeyer. Bak X^-eafa decemda, va greelt moe zalor van Rossia mu Viking dolekik tulon tadleyer.

Vilnius mali 1128 ton folkayxo pilkoton gu lietuvik zo miwayar. Vanpiyir kelu ke Lietuva bak 1323 viele Gediminas sersik ( 1316-1341 ) va in kunte Trakai bam dasugdayar. Banugale folkayeem batlize pimtatan zo vegeduyur.

Tutanara va lietuvafo gazaxo isti XIII^-eafa decemda dilizeyer, remi gazugal ke Mindaugas. Inaf diref gazik, Gediminas az Algirdas az Kęstutis va ronefo tawavo is divatcepe koe Rossia dimolgalicuyud voxe va taway kereleyen gan Teutonicorum veem gee Nemunas bost koe Polska isu lente koe Livonia me rodimdigiyid. Bak gazugal ke Vytautas Didysis, Vilnius vanpiyir kelu ke gazaxopo divlizeso male Balta bira poke Klaipeda kale Tcerna bira.

Bak 1410, arti mon toloya gejasa decemda, Teutonicorum veem koe Tannenberg meld zo ceneyer azen Fratres miliciae Christi de Livonia veem bak 1435 koe Pabaiskas zo surteyer, numen ronafa abdufira ke germanaf boniasik zo vukiyir. Vilnius gu Polska zo katanayar viele bak 1447 Kazimieras Jogailaitis sersik ke widava gu Polska zo tugazar. Vilnius va Magdeburg bioga soe yofteyer. Dere tiyir debak ke aveg ke Hansa gluyista : Deutsche haus ( batlize ke 9^-e otuk koe pebuda ) abrotcafe tanvegemafe emaxe dem duzuma kum inta kene domega ke Neris bost poke savsafe lamone ( Das hoche Schlochs 1^-e otuk ke pebuda ). Rossiaf dolekik va Moskowiten hof emaxe ( 19^-e otuk ke pebuda ) dadiyid.

Ke lokatcalaf kolneem ke bata widava vegeduyuna kum inta, gindafa berma is Stanisław wevala ke 1387 ( 4^-e otuk ke pebuda ) is konakara uja is yonara alkafa kolna evlon gu XIV^-eafa ik XVI^-eafa decemda tigid, numen batcoba va ravalduga ke Vilnius wetce tujradaxo ke ellasafo ortodoksevaxo is dere tucpastaxo ke romafo katalikevaxo vrutar. Raporafa migexa ( lukopton ksevayana, dum kolneem ke lamone ) va kotafa guazafa widava anammadar. Iohan tumtikye wevalapa ( 14^-e otuk koe pebuda ) ke Goth martig wali 1327 is 1427 zo vanmadayar. Bernardiner Clost tucpastaxo ( 12^-e otuk ke pebuda ) tiyir tana locugunaykafa tula ke Goth germanafa vegeduropa : inaf cuisaf taltef lentor vegeduyun kum norka tir evlon gu mon 1501.

Bat wiks ke Braun is Hogenberg va widava dem cuga mona tisa kum inta nedir, ape sedme pimtara munesteyena gan Guillebert de Lannoy vlaanderaf yambik worayas va Vilnius bak 1414. Voxen remi tanoya direfa decemda is acku, cugak ke widava gan germanaf dolekik kum rapor is norka gire zo vegeduyur, batinde sinafa Deutsche Gasse nuda aname Rathaus dotaxe ( 18^-e otuk ke pebuda ) vrutar. Bata ugota mal taltexo gan miv dolekik fereon zo kobureyed.