Fird ke Bazar de la Charité kazaxe (yunkexa)

Fird ke Bazar de la Charité kazaxe ~ L'incendie du Bazar de la Charité (FR)

Madason va nubok van kelt, ton piksesa felkomasa zatca, listafa weltikya dem glabafe bluctenye vugdad. Al piyid enide bak ugal ke sodegasa dolera va Lorik rinud, voxe to ko reliezak ke kusto re zo estobasid. Oretlaf tey va mecoba tarkar, is dace me va kona xariaca : va yasko ke tana jidier, va ara gu tarestafi faltafi edji gincakirafi gu vinotca is imwa azreger, isen to edjiiskafa ayikya lebafa gu ralim koe meem ke bulaf ebeltakirikye dem demakorafa nyoxa ton bocafa vorvera ilblir. Giwasikye ik diref kosik dere ? Aulafe is evlafe, dumede koe teyafa ra co gilanir, nutir degraf tisik djuprodoimpadimas va wivga ko kustobup. Kazaxe abdi fird, yunkexa ke Yunkeyen Loplekuks ke Petit Journal fela, 16/05/1897 « Kas konmane lokultafe egale ixam al sokir ?, ~ Yunkeyen Loplekuks nuer. » Ba 4 ke alubeaksat ke 1897 keve Jean-Goujon nuda koe Paris koe Franca, poke kulupafa Montaigne ikpa, wida kum inta is stama vanmadawer : tcoza martigafa gu Mialukugal va data xama iku beyark pu kulaf anelikeem draged, i va anelikya golustesa ta erbapomara va sayakaf bakanik is wawik. Kalison va mecoba pu rictaga, grustasik va nomyelaf ganduks dace al inkeyed, i va ganduks pulvipin gan kottan : Lumière elpatmimasiko. Voxen ruxozakloya ke terma koafiawer, azen briga az zikexa is storneem : kotafe Bazar de la Charité kazaxe fure di tir teyakap vikeas va biptikya is dacikya... « Kotbata ayikya isu sardikya isu dace rumeikya, i loa semekkirafa is kulafa is kalafa banlize katayana ta sodegara nek levgon is xonukesa virnon mejeson loon dam kosik ke bartaf mialukugal !~ felusik brer. » Dene felapeem, bata anteyara va oluik va moplekura va teca vodiskafa lidopinda koswar : « Toko tir aldo ke yolt ok tufa ok poraceem kapbure merotatcen awalk ? Tok inaf zavzaks koe relkafa vuka ke Jean-Goujon nuda wan tir ?» Awalkoda divswelayana, yunkexa ke Yunkeyen Loplekuks ke Petit Journal fela, 16/05/1897 Ant Léon Bloy katalikevaf funeyasik va ikuza kagir : situndanon da « kazaxe » ( Bazar ) oruzaf trogarn gu kristevafa ceakuca ke « sodegara » ( Charité ) zo kevaykayar, ke fird va « toza ke malyuca » djukutorigir, rovesuteson : « Va aldopo tunuyambo gu jinafa takra elimon is kiewoton ve pestaleyé. Voxen kosikafa otama, tire, va jinafa daava kimayar. » Wori to tan-decem-san-toloyo kalanteyayano alto zo divteykayad. Amuda moe xo ke frank re tigir. Fird ke Bazar de la Charité kazaxe Otcera rem krintala ke vegungafe Hôtel du Palais Gidaxe Kagrupera va kosik koe Berma ke Raba Eldeon gu frank . Fird va kocoba al apkar. Vuestexeem

Fird ke Bazar de la Charité kazaxe L'incendie du Bazar de la Charité (FR)  Yunkesik Fortuné Méaulle  Ord yunkexa  Fela Le Petit Journal  Sanegara 16/05/1897   Tuveli icde Lingeropa