Élisée Reclus

Teliz mal Wikipedia.
Élisée Reclus
1830-1905
Francaf tawavopik is arotievik

Francaf tawavopik is trakusik va arotieva, Jean Jacques Élisée Reclus ba 15/03/1830 koe Sainte-Foy-la-Grande ( Gironde utca ) koe Franca kobliyir. Tir balemeaf nazbeik ke san-balemafa yasa, ke Zéline Trigant tavesikya is Jacques Reclus calvinevafe gertikye, ke yasa inkeyena poke Orthez ( Pyrénées atlantiques utca ). Wali 1831 is 1838 koe La-Roche-Chalais widegama ( Dordogne utca ) dene gadikyaf veygadikyeem atrir.

Tise san-bardafe, koe alkafa reila koe Neuwied koe Germana jonvieler lize va latinava is konakara ava raver. Bak 1848 va alkopafa vayara koe calvinevafa kotla ke Montauban bokar neke va sutesik dum Saint-Simon is Auguste Comte is Charles Fourier is Lamenais dere toz belir. Divlapune bak 1849 nope otcera, va alkopa jovler nume va taves play dene reila ke Neuwied di kereler. Bak 1851 va Berlin koirubar lize va tavera ke Carl Ritter germanaf tawavopik koe kotla walterektar.

Bak muvugal ke 1851, va Franca remlanir, mal Strasbourg kal Orthez, do Élie Reclus felusik berikye. Olgalicuyune mali bane sare gan gaderopaf rieteem ke abduaxeva is arotieva, va taneaf krent vey nuyucafa koswara : Vonera va nuyuca koe tamavaDéveloppement de la liberté dans le monde ). Kaiki kevsokara ke 02/12/1851, eze Franca kuranon soker. Wali 1852 is 1857 dun koyar, blidason va uneme, tulon koe Engla is Eirea is Tanarasokeem ( lize va levetireva tukultanon kosmar ) az Kolombia is Antilla.

« Va intafa gotuskusa ayuca en gojiligat, ins jeaweson do winta, va intaf xanteem isu reugal isu stekef mukot is enekefa rietava gomodisuket ; to batcoba en tir abduaxa ».

— Élisée Reclus ~ Ayik is tawava


Dimlapiyise koe Paris, Élisée Reclus bak 1858 va ebeltikamafe Clarisse Brian yerumar aze sin va toloya nazbeikya di dikid. Va Seltom ta Tawavopa denfir. Va francava taver ise va koyasa nyapexa sutelar. Inafa taneafa, Koyara ko Sierra Nevada de Santa MartaVoyage à la Sierra Nevada de Sainte-Marthe ) bak 1861 zo sanegar. Bak 1863 va zabdura va dodelikaf dotegis omelt ( Crédit au Travail ) paker ise va GesiaL'Association ) fela gader. Bak 1864 va Walvedeyafa Gesia ke Kobasikeem ( WGK ) yoter, aze va Mixail Bakunin rossiaf artowasik kakever aze va walvedeyaf abeem ke WGK koe Swiza tegison paker. Miledje, valey jontik vayaks dafun pu Revue des Deux Mondes virda, va koplekuks va Dotak ke FrancaDictionnaire des communes de France ) bak 1864 sanegar, az inyona opafa neva : TawavaLa Terre ) ton toloya karba bak 1867-1868 az Izva ke kuksamaHistoire d'un ruisseau ) bak 1869, i va neva tisa kiewatcapafa. Clarisse yerumanya bak 1869 mulufter azen ine do Fanny Lherminez etorkon blir.

Bak francapreussafa geja ke 1870, Élisée Reclus va vorn ke Vedeyaf Susikeem wetce kuranik zanivar. Bak bareaksat ke 1871 gu vintera ke Dota ke Paris va int kavangluyar. Gralomeyene gan ervolia ke Versailles, gan Gejaf Pirdot zo kojizar nume gu rezgalera ko Kanaka ba 16/11/1871 zo lanzar. Voxen inafa opafa targuca va pumbara is kevotcera nekir numen gakera ke arotievaf grupeik gu divstaksesa sanda dive francaxo zo nuner. Ko Swiza is Italia va int divblir lize va artowasa anameda ginobar.

« Edeme winafi direfi bali arse tir aklafi, lecen remi opaf is nuvaf ugal tigit, nume bowesik, kalzanin gan razopikafa is tavesikafa ervolia, tori win va seltafa grustara egad lize kotcoba dum koe iaxe zo verkatar, lize foalk va kotcoba lidam dace ayik gadeter ; lize bantel titir racka betatana bro guazafa azilxa viele djumovatar ike djukuranitir ».

— Élisée Reclus ~ Pu tawadayik jinaf berik


Fanny etorkya bak 1874 radekason awalker. Diretandon va Ermance Gonini yerumar ise va Clarens ( Swiza ) koirubar. Do Pyotr Kropotkin va arotievafa tegulara koe Franca is Europa. Dim Paris bak 1879, va sanegara va cugexafa Warzafa tamefa tawavopaNouvelle géographie universelle, 19 karba mali 1876 kali 1894 ) ektudar, wan koyason koe kotrafa tamava. Bak 1880 Izva ke meftavaHistoire d'une montagne ) suteks isu Towara is ArtowaraÉvolution et Révolution ) zo sanegad. Bak 1882, va abduekrent ke Lorik is SokaDieu et l'État ) ke Bakunin nik sutelar. Bak 1886 va Alexandra David-Néel rungruper aze va nucapa doon kiewagitir. Do yasa ko Sèvres poke Paris va int inker lize va kobara wanur.

Alexandra David-Néel, 1886

Bak 1892 va moavafa diema ke Seltom ta Tawavopa ke Paris is play ke tawavopaf tavesik dene nuyafa kotla ke Bruxelles mbi kserar neken va gaderopafa tegira dun sayudar. Bak 1896 va Aroti sposaf suteks sanegar, az va kabdunedira va arotievafa rietova kan Towara is Artowara is arotievafa RietavaL'Évolution, la Révolution et l'Idéal anarchique ). Bak 1898 va Tawavopaf Kizey ke Nuyafa Kotla ke Bruxelles zabdur is va ji piskusi va tawavopaf liwot koaskir. Bak 1902, va Istefo GindaxoL'Empire du Milieu  ) sanegar ise va abduekrent ke Ta bliPour la Vie ) ke Alexandra David-Néel suter.

Élisée Reclus ba 04/07/1905 koe Torhout koe Belga awalker. Inafa bocafa trakopafa neva, Ayik is tawavaL'Homme et la terre ), kabdion tenukeyena, bak 1908 di zo sanegar.

Kalkotavayan suterot[betara | va krent betá]

  • Pu tawadayik jinaf berikÀ mon frère le paysan ), kalkot- 2014 gan Damien Etcheverry, Wikikrenteem dotay, banliz

Sanegaks[betara | va krent betá]

Élisée Reclus tiyir sporgaf sutesik. Va jontik tawavopaf sanegaks suteyer, is dere watson gu gaderopa is arotieva ok lida. Valeveon, mevarafa vexala dem inyon sanegaks :

Grabom is sanegaks ke Élisée Reclus

Tawavopaf sanegaks

  • L'Italie dans la nature, l'histoire, les habitants, l'art et la vie présente, 282 p., Società editrice libraria, 1902
  • Guide du voyageur à Londres et aux environs, Paris, Hachette, coll. Guides Joanne, 1860, 530 p.
  • Voyage à la Sierra Nevada de Sainte Marthe. Paysages de la nature tropicale, Paris, Hachette, 1861, 305 p.; éd. 2015 ISBN 9791093533209.
  • Londres illustré, guide spécial pour l’exposition de 1862, Paris, Hachette, coll. Guides Joanne, 1862, VIII-216 p.
  • Les Villes d’hiver de la Méditerranée et les Alpes maritimes, itinéraire descriptif et historique, Paris, Hachette, coll. Guides Joanne, 1864, 501 p.
  • La Terre. Description des phénomènes de la vie du globe, Paris, Hachette, 1867-1868, 2 vol., 1554 p.
    • I, Les Continents, Paris, Hachette, 1867 (daté 1868), 783 p.
    • II, L’Océan, l’atmosphère, la vie, Paris, Hachette, 1868 (daté 1869), 771 p.; éd. Infolio 2010, ISBN 9782884745987.
  • Histoire d’un ruisseau, Paris, Hetzel, 1869, 320 p.; éd. Infolio, 2010, ISBN 9782884745987.
  • Nice, Cannes, Monaco, Menton, San Remo, Paris, Hachette, coll. Guides Joanne, 1870, 192 p.
  • Les Phénomènes terrestres, Paris Hachette, 1870-1872, 2 vol., 469 p.
    • I, Les Continents, Paris, Hachette, 1870, 235 p.
    • II, Les Mers et les météores, Paris, Hachette, 1872, 234 p.
  • Histoire d’une montagne, Paris, Hetzel, 1880, 306 p.
  • Nouvelle Géographie universelle, la terre et les hommes, 19-1 volumes, Paris, Hachette, 1875-1893
  • L’Afrique australe, Paris, Hachette, 1901, 358 p.
  • L'Empire du Milieu. Le climat, le sol, les races, les richesses de la Chine, Paris, Hachette, 1902, 667 p.
  • L’Homme et la Terre, Paris, La Librairie universelle, 1905-1908, 6 vol.
    • I, Les Ancêtres, Paris, La Librairie universelle, 1905, 597 p.
    • II, Histoire ancienne (Antiquité : de la Phénicie à Rome en passant par l'Afrique), Paris, La Librairie universelle, 1906, 582 p.
    • III, Histoire ancienne (Chine, Inde, océan Indien, océan Pacifique); Histoire moderne, Paris, La Librairie universelle, 1906, 652 p.
    • IV, Histoire moderne, Paris, La Librairie universelle, 1907, 663 p.
    • V, Histoire moderne (1780-1900); Histoire contemporaine, Paris, La Librairie universelle, 1907, 575 p.
    • VI, Histoire contemporaine, Paris, La Librairie universelle, 1908, 579 p.
  • Paul Reclus, Pierre Schoenaers, Élisée Reclus, Les Volcans de la Terre, Bruxelles, Société belge d'astronomie, de météorologie et de physique du globe, 1906-1910, 515 p.
Gaderopaf sanegaks
  • Évolution et révolution, Paris, Bureau de La Révolte, 1891, 61 p.
  • L’Évolution, la révolution et l’idéal anarchique, Paris, Pierre-Victor Stock, 1897, 296 p.
Gaderopaf krent
Lidaf krent
Blirizva


Ewava va suteks[betara | va krent betá]

Élisée Reclus

Élisée Reclus

 Koblira  15/03/1830,
 Sainte-Foy-la-Grande, Franca
 Awalkera  04/07/1905,
 Torhout, Belga
 Vedeyot Franca
 Eba Tawavopik
  Grabom 

Tawavopa

  • La Terre (1867) – Tawava
  • Histoire d'un ruisseau (1869) – Izva ke kuksama
  • Nouvelle géographie universelle (1876-1894) – Warzafa tamefa tawavopa
  • L'Homme et la terre (1908) – Ayik is tawava
  Tuveli icde Suteroteem 
  Tuveli icde Arotieva 
« Minafi bali tir to artfira va rietavafa kotunuca lize vedeyeem va adomtara ke bowere ok ar vedey mea di olegar ; tir isk dem bowere, tir aroti, i an muxaks va vura ».

— Élisée Reclus ~ Icde aroti