Toloy nik (suterot)

Teliz mal Wikipedia.
Aller à la navigation Aller à la recherche
Toloy nik

Toloy nik tir berpotam ke Guy de Maupassant sanegayan bak 1883 koe Mademoiselle Fifi larma.

Vildeks

Debala tir bak 1871, imwugal va Paris toz tuidular. Widava tir brigafa is gabentafa, sanelia zo aelesir kiren kelu gan preussenik zo deblamer. Gindaxo ke Napoleon III va geja pu Preussena al dakter aze sokasane radimifisa va gindugal ba 04/09/1870, va bata egalefa geja al dakir. Blira ke kelu gan bwevara ke bulisa kaima moe Mont-Valérien bria zo armorar ; mea estuksam tir, metan va widava rokolanir ike rodivkanir.

Morissot weltikye to duxanon battode moe bedom gabenton gozar. Tir moraf bartiveliasik, aulaf is stuviskaf, diliodon blis. Inafa antafa skeura tir conyokara, vox anteyasa skeura riwe tisa ukeafa. Gelkeon, ugale dili gazayar, ba kot taneaviel va Paris gibuluyur ise va kelot kal vema ke Argenteuil rundanyayar lize afizcekon conyokayar. Voxe re tir gabentapafe kiren kota divlanira ok divlapira zo biuckud. Voxe zo felber viele va kelda ke Sauvage weltikye gamdar, i ke nik dere tis diliodaf dolekik is lugavaf onasik. Sin kene domega ke Seine bost al rungruped ise va pakara va auluca ke tawaday taneavielcekon albad. Va jontik bartiv amlitason tiskid, disukeson va ezaxa is almason va awaltolya tuidulasa va ge. Batcoba en tir sinafa kiewotafa kalaca.

Belcon djukuravlamad aze va oviskaca pu int bundad : i va tanoya kremxa, az toleafa. Ruyat is taneafa imwugalafa olya va sin kalion alnitcar. To Sauvage W-ye va osaca bam drager : edemex va Paris co fu bulud enide co onatad ? Va lan vombik rokseras va divlanisa novexa grupecker numen va francaf sues play batkane roremigatad aze va intafo onaxo fakon rokallanitid. Toloy palik abicedje klabud nume dem ugol di mallanid. Tire va tciamafa novexa gan vombik naf gu Sauvage W-ye mbi paasled. Ko tawaday xeyon abdulanid. Kire ede co xaked da va preussenik kevlanid ! Voxen mecoba va auluca ke bat imwugalaf afizcek skalter. Artlanison va bost, va Marante ewala nyased, i va revielon ewala nutisa vlardafa nume ve modovadad da bat zugaf preussenik men win pokeon rotir tigid... Xabe, to onarugal tir.

To galovafa onara tir. Kalion wogides brawesk koe dona dem licanaf ametc zuvdawed, i koe dona perdoena koe Seine. Sin onad, dum yatkik dun onad vieli auluca ke lizuk gan buzera zo levempar. Iluon kaima ke Mont-Valérien su bulir. Va vikizonduk ticstis va faltaf kelt wid azen divroidas lor artstir. Bata tizafa kimbara va ageltuca ke geja jupar da va gaderopa goreston di keyaksed. Gu riga dotrakuckud : metan titir nuyaf, korik gan fixuk wan zo kladatad ise gan gasiza zo papteted. Riga ke sinafa ovara ke volkeunisis avinkik tir mana.

Onara aulon zo linver viele pestalera ke lana tigira kadimeon va sin rwodesir... Sayakik tiskis va nickaf tantazukot va sin djuviltason kulmed. Preussenik ! Waroldon ko pemaxomo zo stad, kal ontinaf blakeraf fayik debanyes is pulvis kan donafa francavura. Bantan dewitcar : bate toloye ayikye me tid conyokasik vols toidesik. Numazon va bat doleray opelapon drager : ont va remravlem adraf gu kaiklanira va francaf abduplay ba dimlanira zurted, edeme zo zeltatad. Va vulama ta gorara oxam dadid.

Bat toloy kimtaf onasik zo vanmecobad ise va intafa roklara gavepon sonked. Wori, dace viele fayik klioton kobenplekur numen kal klibusiktum zo stad, pune wan me pulvid. Fayik va battol az bantol dace eznarir ise granser enide va remravlem razdad. Morissot W-ye is Sauvage W-ye skotceped neke vol djuxaad. Acum bam fayik va klibusikaf tum korundar ; Morissot W-ye is Sauvage W-ye drumon zo ranyasid aze toloy nik taneatomon nubuzavad. Viltara tauler, toloy diliodaf doltik zo glebad. Ware lidaulon, preussenaf fayik kobenplekur da tan sayakik va onakseem konarir aze va kabay ko fovung mimad. Ede brawesk blion co zo gerinsed, pune co tid lokiewaf.

Koredik

Morissot W-ye

Meka altokafa pimtara va Morissot weltikye zo malzilir. Ine wetce ogafamik volkanespaf is bartivelias : « Morissot W-ye, bartiveliasik wetce sok, is katecton guvengafamik [...]»

Morissot W-ye va cug taneaviel ta onara kene Marante ewala afizcekon djukatiskir, gazdon artlanison az ba miel dimlanison. Va Sauvage W-ye to banlize dile kakever ise paskalenyer : « sin va sinton al tunayad ». Va ruyat nuvalbar larde to int « va toleafa kusaca » pu nik drager, trabe va ar galemacek dem krema. To int gan germanaf fayik zo eznarir enide va dositik di relmer, voxe Morissot va meka ewa kalir nume batdume va int lanzar.

Sauvage W-ye

Sauvage W-ye wetce « pwertamaf is itupaf omik » zo pimtar. Inafa femdolesa dolta keve Notre-Dame-de-Lorette nuda koe Paris tigir. Dum Morissot W-ye dositik, tir ukaf gu conyokara is gitiskis va taneaviel gu nugera va kabay. Int lidam nik tir volkanespaf voxen auluca ke kakevetcaf afizcek vaon gucecker.

Int va Morissot W-ye mo ewala doimpar lize sin di zo gralomed aze di zo aytad : « Ede co lanit ? – Tokliz ? – Ta onara, kle. – Voxen tokliz ? – Voxe kal minafa ewala. Francaf abduplay poke Colombes tigid. Va Dumoulin vombik grupé ; fakon ronoremlanitit ».

Germanafe fayikye

Pimtara va germanafe fayikye vas tela icde rostazik laneke vektar : « Imkiraf gulindik, moe trovgon rova vikizasis va plopo kum rigela [...]». Ine francavur ise va sinafa tigisa debala pu toloy stolenik pebur. Nubrupur : « Kle, weltikye, kas al onanyac ?»; « Va batyon kabayam vere gerinsel edje wan tid blis. Batcoba titir sutkafa. » Voxen bata brura battode vol fudjer nume va alpoz ke nakila tuvolgalar. Ine tir mekeik larde va dika dragera pu toloy nik ta seotara va remravlem askir abdida mesidjeson volmiv zeltar.

Drunara

Geltrevaf berpotam

Jontika rulda jupad da Toloy nik berpotam tir geltrevafa rupa. Taneon xuta. Bat berpotam gan lana geltrafa bifa zo koswayar ; va runda vanmia kruldesa zikexa tisa tela ke Paris widava bak grupena rekola ke francapreussenafa geja narir. Pintakirafa pimtara va lizuk zo askir : « Va kelot van Argenteuil girundanyayar, koe Colombes buluyur aze ko Marante ewala laniyir. » ; « Orgemont bria isu Sannois vamoe vemarsa. » Belisik va debala ke Paris bak geja rietamar : « Paris zo elekayar, zo aelesiyir, embeyer. Proklami koe kepaita turiaweyed, isen grok volfrofaweyed. Betcoba turotestunayar. », is va preussenaf ruzadesik : « balemoy ranyes ayik, i va ervokiraf is lukastkiraf ontinik, i va vagekiraf dum tantazukotkiraf kwik is tiskis va azekaf atsot [...]». Geltrevafa xuta jupar da lana zikexa zo inker lize belisik va koredikeem rogestir. Ravalduga ke bat enentaf koredik va geltreva ke rupa is kofira ke belisik dere paker, kiren suterotik ins me pimtackar. Tire batkane belisik va intafa ewavara va toloy gradilik roglotcar, me turestanon gan corara ke askisik.

Meka merotisa welvegara batlize tir ; batdume milinde mancoba tod gejugal co rodilizeyer, minaf toloy ayik gu toidera zo uculed : « Sedme jin, tic toloy toidesik stakseyen ta pitcara. », aze mevurdembon zo aytad aze ta gestura va kabay zo komimayad : « To siluk ke kabay, re. » Voldum jontikviele gradilik gan wotrafa pomara oku welvegara bocavulon zo giwar, minaf toloy koredik luxeon jiadad milinde bettan bal geltrafa blira rotir co jiadayar, trabe fistukon is kinestamon. Batcoba va rupa loeke tuudutar larde mecoba sye vankolayar da batvielon fu awalkeyed ; vielcek nivon al tozuweyer. Ostik tciluca ke grabom jupar da mi ware tir loon kimtafi ; xonukera sokisa nope opeluca is wiluuca ke liza gevapar : « Viltac ‼ ~ fayik iegayar. San-toloya viltara va tanoya askiyid. Sauvage W-ye mo pez vere lubeyer. »

Opelafa is bagaliafa nuca

Nekev vonerama va sinafa nuca remi bat kliotaf grabom, inafa zolonuca me zo romeur. Armara mali vergumvelt tozuwer, i mali vergumvelt ganes va belisik ta avplekura va paskalera is opelafa albara ke toloy koredik djukatiskickis va taneavielcek ta belcon onara. Sinafa nuca tir listackafa kire va ewa me olegar ise nutir lana jeawera : « Dile prilayad ; voxe mekalison gilduyud, dikis va yona milafa dulapera is yona nuxafa pestalera. »

Ba bat viel, toloy nik tid kalaf gu kakevera voldum gubefa goaspil : « Va sint biwe kagrupeyes, votcukon nubalicad, kontepen gan bata kakevera mantode amidapon. » Gejorka va kota bifama ke blira loeke nutunoar. Dum guazaf nik, doon lanid aze belcon ulimid aze ta onara dum ban gubef ugal djukulanid : « Awaltaranya va intaf idul gu sinaf epiteem celesir ; va koncoba mea terektad ; mea trakud ; va arak ke tamava afanad ; onad » Banlize va katrasin kaluca fronad aze toz keyaksed inde mea al askiyid : « Aze aulon toz prilad, grogason va gaderopaf zvakapeem [...]»

Sinafa nuca tici berpotam dere is dalon zo yunker. Tire, tarkason va gluyaxeem ke nuca, va meka giva pu germanaf fayik di bilded, nekev dratcera gu waroldafa xonukesira, isen dere metol va jovlera va bantol ta giwara va intafa blira malnaler : « Aze, laizon [ fayik ] ranyar, va toloy francik illanir, va Morissot lev ma narir, ilamon doimpar, omon kalir : ~ Kalion, va bata korictaxa ! Rinaf palik me grupeter, nuvelatá tukrenugawes. ~ Morissot va mecoba dulzer. » Bata takreluca kev xonuka va nucarsa ke bat toloy ayik danedir. Kle, remi awalk, sinaf tikieem gan nyukuca vol zo kifutur. Milinde sinafa nuca tiyir pufafa ise va ewa me olegayar, pune xonukera va mila kafa pufuca nekev entuca ke toloy koredik kavager. Numen zijnafa is dioliodafa nuca gan kevaxara ke oxaf klibusik loeke zo armar.

Solovuca is udutuca bak gejugal

Bata rupa bal pilkovafa orka va int rundar : isti geja kevusa va Franca is Germana tigit, i isti geja tisa klicon solovafa is abicedje ( tevoy aksat ) nekitisa va mon 260 000 awalkik. Bak deblamera, blira koe Paris tir wavdafa : sanelia zu aelesir ise zo kovudar maneke va int me djuprodivogar : « Paris zo elekar, zo aelesir, ember. » Suterotik va bata debala soe me rontion muxar ; va bat sutasok to kan Morissot is Sauvage toloy gradilik tixolon yunker. Tire edje toloy nik va onara keyaksed, i va gelkef is gubef djukalomegayan virt, pune pu sint erud : « Tokviele gire lapitit ?» Tire, nope artlapira ke preussenik, va bata aulafa ela mea ronovud. Suterotik va enja dem sinka rodadina koe Paris dere tixolon miwar ; moi kremura, kottol pester « dum getinesik dem jivot kotraf gu ruyat. » To blayakam muxas va debala ke toloy nik anton tid dumede batcoba tiyir ki ke sinafe vielee nume va int al vandelvejayad. Tixoluca de manyona giva jupar da fistuke ke sinafa debala me zo laumasir ise va luntafa pestaka ke belisik zo nazbar, i va pestaka loon becafa num rotir loon kogabesa kir loeke vadjesa va geltrevafa debala loon darsafa.

Nekev jontika golevgana irutara is nekin volerod, toloy nik va paskalera tegid enide va intafa skeurapa di lajupaskid, nume va diliodafa debala ke diliugal co di katrasid, trabe va conyokara. Va tutankomana vieleuca djudivfid ise va nuyafa deasera remi abic bartiv djutiskid. Wori bata kiblara va intafi bali fu fartur. Loon va nuyafa vula fogevanlanid, pune loon va lanafa xonuka vanfid. Va pemaxo poke preussenaf volnik exoned ; numaze edje va exaksara ke geja sumuon dizved, pune gan preussenik zo gralomed. Arti stolerama, mil toloy nik zo aytad. Sinafa jiadara gan opeluca ke klibura is pwadera dace loeke zo yondar.

Voxen solovuca is udutuca ke geja va belisik cugeke pedrad, pune to viele vula ke deswara va toloyo alto tir. Sino baltayanon gu rapor, opelon ko lava zo kabud ise ton sinka mu kabay zo atoed : « Alto, poon tolveraston sespano, zo ilkabud, va livaca pimtad, aze, ranyeso yoke rapor taneon doimpas va nugeem, ko bost estobad. » Germanaf fayik vengatason va tegira, loplekur : « To siluk ke kabay, re. », dumede antafa kiova roculimena pu onasik co tir da va kabay kabdion co rotuyud, batkane tire razdason va fastuca ke gomilara. Azon blira ke preussenik ginur, dumede mecoba sokiyir isen bli ke toloy volgunik va sin me vanolar larde bata xonukera anton tid tola ke konakara decitoya. Rupa ba bata ewa tenuwer : « Va batyon kabayam vere gerinsel edje wan tid blis. Batcoba titir sutkafa. ~ Azon in va plo gire toz vikizasir. »

Solovuca ke awalkera ke toloy nik nekiyina gan geja va belisik me rodivvawar. In zo stuikemer, ziwidenon gan wiluuca is akoyduca ke jiadara ke toloy koredik. Bal kota geja, voda ke alto is swava mea krulder : bliso alto volke mana neya gu gobalieno alto loviele zo torigir. Blinuca is kruldera ke zvakiskaf opelik sometorigid.

Bat berpotam ke Maupassant konakilas va unaykackaf koredik dis va rokipegana jiadara jupar da kottan va udutuca ke geja voxis askina griayara ve jiligar.

Dere rupel

  • Guy de Maupassant : Francavaf francaf suterotik ( 1850-1893 )
  • (fr) Deux Amis, dene Wikisource ( xantokrent )
  • Toloy nikDeux Amis ), kalkot- 2013 gan Élisabeth Rovall, banliz
Toloy nik
Open book nae 02.svg
XANTO
Vergumvelt Deux Amis
Sutesik Guy de Maupassant
Ava Francava
Suterotinda Berpotam
Evla 1883
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg