Stuva ke Tom Sawyer (suterot)
|
« Gorayá da va bate rumeikye kali milgugal me di stá kiren in dum kotban forgaf gradilik ke suteroteem co rotuxadar numen belisik va in oluyon co vligur. » Acum Mark Twain va gorara tumalyar. Me kuranir da gradilik di tuguazawer. Bat rolaf rumeikaf reiz tis drom ke facilaf rumeugal di vanpiyir atayafa neva brostasa va milgik lidam rumeik. Silpacama...Bak 1845-e sanda koe Saint-Petersburg tu pinapafa widega ke Missouri galdolk koe Tanarasokeem, kene govitaf Mississippi bost, jotaf gadiskaf Tom Sawyer gan Polly ziavikya zo gaar. Jim jotaf ebeltaf levetirik gu zanon ke ina kobar. Tom tir vepokaf is balges jamik, i tec « oretlikam » abdialbas va vefara koe aala is tawadayafa yatera ko Jackson ewala, lodam va fanya ke uja : mielcek leve bitej is pemaxof tey do Huckleberry Finn lokiewaf palik tis duref dofugik is jotaf keldusik blis kene selt. Tom tir facilaf is rwamaf is djukakotcomes. Tir gradilik ke konaka testafa zixa sinton verzasa : va boteda dubier, va vultera ke jaxok grustar, va digea ke bemagadesik kan karvol levtiolter, va uukany do palik vindar oke va sin rwamar ikz-. ... is stuvapaAskura ke berpot adre tir loeke polesis isu dres kotviele Mark Twain jupar da adjubera ik vebena mona ok tacedik aksus va yupxo koe nega vezud, is Jim Indiik tis dilizesaf ikorik. Fuglara ke Tom va runda gu vuda xaadar viele in va McDougal mielakafa arula djukuvestar lize va mayesis Joe Indiik vumbes va vesnol di wir. Luxe jwaneyara jiadana ba kosmara va ageltaf kaip, ina va berpot ton vokafa straga tenuker. Tuke bat trasiks, Tom is Huck re tid kulaf. Tom tir kalaf aze va pelfudikafa blira keve ziavikya koe arboyafa waba dem tanoy zanis levetirik non narar. Huck va bata laizafa kuluca luxeon nalejer. Batcoba di tir maluta ke « Stuva ke Huckleberry Finn » berpot : jotaf Huck va bata glastafa blira me ronaler isen larde tir fanikaj, pune va Polly ziavik ke Tom yateson dubier ise pomar da inaf levetirik otcer... Mialon mivizvaf berpotKore Saint-Petersburg tir sordafa wida, pune gu Hannibal widega zo koswayar lize Twain wali 1839 is 1853 bliyir. Sedme suterotik, xo is dace lae ke wida, voxis yon koredik isu bifa gan rumeugalafa setikera co zo dukaliyid. Jackson ewala gri gelbe ke jamik duxibes va nuyuca, ton « mevestayana is saneliiskafa brava sume kota ayafa blira », en tir Glascock ewala ( batugale awiyisa ) lize Twain suskeyer. McDougal arula vas McDowell arula en vadjer, i vas arula batugale warzon yoltana gu « Mark Twain arula ». Voxen kas batcoba en tir beviafa pimtara va lan fudaf gelkeugal ? Kake weznara, konakeca ra va belisik roskalted. Taneon, Tom tir vokaf koredik : inafa balgera va minafa vaduluca jekur, voxen Tom dere tir rotuxasik is tafusik, i jamik vewas va kota sugara. Isen kore arga koe Saint-Petersburg gazar nume va yona ilamota ke Tom pakon diver, pune widega va moavavoza is zvak ke ruyatakola soe levgar ise vas konak divtawasik va awalkoda ruldar ise va tanoya adjubera wir... Enwe, Twain dun tir rankesik va ayoxi : inafa bruxa tir zugaf tove milgik is murkura ; voxen va to malyerot is gaara is moekote alka lodam ayaf olkik dilfur, i va bat baroy swalot ke amerikaf selt rotaskipedan gan yona daavafa zoba ke Tom Sawyer. Wana is zaleksTom Sawyer koe konakec krent ke Mark Twain gire tir. Taneon koe toloy berpotam loleon kiewaf : « Tom Sawyer Abroad » ( Tom Sawyer koo tamava, 1894 ) lize Tom is Huck va vipka volins rundanyad. Arti tolda, Tom koe « Tom Sawyer, Detective » ( Tom Sawyer kogrupasik, 1896 ) vezur lize toloy miltel va orikafa skujera dem pisonara is jelikeem dimaotced... Isen tire « Stuva ke Huckleberry Finn » lize Tom nutir melukraf kapbure keldus nik. Tere stragat da loon tol-sanoy elpat konakilas va Tom Sawyer is mon san-tevoy sumewisikifa siatos don tanoy vartaf blizesin zovdakstum zo warzeyed. Dere rupel
|
 | ||||||||||||||||
.svg){kind=icon}