Katia Bengana

Teliz mal Wikipedia.
Aller à la navigation Aller à la recherche
Katia Bengana
1977-1994
Jazairaf oldik

Katia Bengana ( kobliyisa bak 1977 koe Meftah widava az adjubeyena ba 28/02/1994 koe mila widava ) koe winka ke Blida koe Jazaira tiyir jotafa oldikya. Nekev xonukadratcera ke islamevaf lugavevik, va hijab italk vol djukutiskiyir. Radimi inafa xonukera, vanpir leca ke lyumara mu ayikyaf rokeem koe Jazaira.

Blirizva[betara | va krent betá]

Tison 17-dafa, va tiskira va hijab italk lakoveban gan alkaf ukeik koe Jazaira titi wideytafa geja kevvewar. Dene olda me klabur da va vil volunt muxar batdume gu mutabarridja ( rietodaf ravlem ke Alkuran sugdalas vas nuyukikya ) gan lanyon oldik yotes va lugavevafa rieta zo duvur. [1]. Konakviele zo xonukadratcer.

Adjubera[betara | va krent betá]

Wali 05/01/1994 is 28/02/1994, san-baroya ayikya gan islamevaf lugavevik nope rotafa blira zo adjubed. [2].

Ba 28/02/1994, Katia Bengana va olda koe Meftah divlanir lize tir vayasik aze do palikya va intafa mona vanlanir. Arte solumama mal olda, toloye jotafe ukeikye tise savsaf vayasik ke olda kadimu alava laizon awid, gison va zelt. Va palikya ke Katia sugdadad numen bantanya mayeson otcer. Katia Bengana bam tir antafa lente toloye megrupenikye. Va sonkera me ugalir viele adjubesik va ervo van ina tuvlardar. [2][3].

Adjubera va Katia Bengana me tir pilkafa zatca. Xonukera ke bata yikya gotiyir tula, i walzera pu ayikyeem ke Jazaira enide sina todon gu vewara va kalvegera va islamevafa vareva, va direfi bali sonkeyed. Weti abic viel abdi Katia Bengana, Amel Zenoune Zouani rokopafa vayasikya [4] gan ervokirafa lospa koe Sidi Moussa zo aytar.

Exaksara[betara | va krent betá]

Adjubera va Katia Bengana va jontika jazairikya konter. Ba 22/03/1994 rozanon gan Rassemblement algérien des femmes démocrates ( RAFD ~ Jazairafa Kabelcara va Sokasanerotiikyeem ) is Association pour le triomphe des droits des femmes ( AITDF ~ Gesia ta Xultura ke Ayikyaf Rokeem ), konaka kunoya ayikya moe Addis-Abeba viga koe Aljazair exaksad, axazeson is adjuson kev islamevaf lugavevik is ploteson va delt ke sinyon kosik [2].

Brijik ke ayikyaf rokeem[betara | va krent betá]

Folva ke Katia Bengana gu skerafa piza gan islamevaf lugavevaf feleem zo duvuyur. [5]. Nekev batcoba, inya al vanpir tan brijik ke lyumara mu ayikyaf rokeem koe Jazaira.

Vuestexa[betara | va krent betá]

  • (fr) Feriel Lalami, Les Algériennes contre le code de la famille : La lutte pour l'égalité, Paris, Les Presses de Sciences Po, 2012, 362 p. (ISBN 978-2-7246-1254-7)
  • (fr) Allas Di Tlelli, Katia Bengana, une lycéenne qui a nargué l’islamisme, Éditions la Pensée, 2018, 260 p. (ISBN 978-9931-708-07-0)

Katia Bengana

Defaut avk.png

 Koblira  1977,
 Meftah, Jazaira
 Awalkera  28/02/1994,
 Meftah, Jazaira
 Vedeyot  Jazaira
 Tegira  Oldik
  Bifa 
P Parthenon 2.svg  Tuveli icde Izvopa  P Parthenon 2.svg