Fliwuca (elpat)

Teliz mal Wikipedia.
Aller à la navigation Aller à la recherche
Greed ( elpat ke Erich von Stroheim )

Rupa[betara | va krent betá]

Titi 20-eafa decemda, McTeague ctakik dem latkaf kendakiraf usuk koe moavaxo ke California kobar. Dile ve zideper batdume va bulura va kawoda gorar, pirdanon gan ilblisa gadikya, ise vanpir avlotcaf tcices talgaselasik. Kadimion va intaf ilput koe San Francisco koinker. Marcus tir anelik ke McTeague.

Bak yasafa kapa koe tawaday, Marcus va talga ke Trina fertya arber. Va ina den intaf naf talgaselasik ekeyuson vanstar. Konaka fruga tid adrafa numen McTeague va Trina adre korenapar eke kutcar viele ina zo gripestar. Vibane gan jugemera, ine pu Marcus tere welidar. Bantel va runda olukon xaadar ise va kakevera va yasa ke Trina mu McTeague dace grustar. Trina tore tiyir prealafa voxe va McTeague tere kevnaler. Bam zo givar da va 5000 dollar talolk su nyosawar. Marcus va intafa fastafa zatca batcer. Tolonga fure kurer voxen Trina va bulura va yasafa begama is guzekara va renarura do yoromafe McTeague flecupur.

Ugal tiskir numen sintafa skedara ke tolonga vanvuwer kore Trina va akolesafa erbaskeura voner. Fure gan geltraceem ke kurera zo nuvawuzar numen inafa skaltera tuastirbawer. Luxeon Marcus va McTeague icde erba al motcar maneke kan wed al dratcer. Voxen McTeague me vidjer. Marcus divkiavatason va tolonga artlanir, pebuson da fu mallapir aze va reda di koirubar. Tolonga zo kiazar.

Kadimion McTeague va twa kazawar, i va twa walzesa da va exava me ronoksuber kire me tir dobkirafe. Trina trakur da bancoba tir rankera ke Marcus. Lubera ke tolonga tozuwer numen McTeague va warzafa kobara gonaneyar. Koe zazda toz gilulir. Trina va talolk gibejebesir voxe va jwa vol djumopoyer. McTeague gan Trina toz zo idar nume tere bulur. Ina va tcatesikafe une trasir.

McTeague kraber aze dimlanir. Romalestutuson, va erba moimaxur. Ina kevvewar. Kadimion ine zidepeson gire dimlanir nume va ina goviton aytar, divbureson va jwa.

Bam ko talteka mallanir lize va moava koe kawaxo djupotrasir. Marcus va finta kaaneyasa va McTeague wir nume do fiesik toz onkar. Voxen artlakison va Death krant, ar onkasik nope idulodap loon vol djudositad.

McTeague koe letaxo ant avlar. Fure Marcus va ine katrasir aze kottol belcon krabed, virnon siputeson. Tere va sint moliked : McTeague va Marcus xonukalier, voxen bantel kan koxol va int al gluyedar. McTeague tir ikseyene nume keve inafa awalkoda is intyon moavaf talolk va awalk ker.

Ckanef iyelt[va krent betá]

  • Vergumvelt : Fliwuca
  • Skura : Erich von Stroheim
  • Nios : Erich von Stroheim, June Mathis, Frank Norris
  • Warzera : Irving Thalberg, Louis B. Mayer
  • Lexa :
  • Afigasutes gadesik : William H. Daniels, Ben F. Reynolds
  • Kseara : J. W. Farnham
  • Warzesu sistu : Irving Thalberg, Louis B. Mayer
  • Anamzilisu sistu : Metro-Goldwyn-Mayer
  • Patecta : Tanarasokeem
  • Ava : Englava
  • Pol : > 500 000 $
  • Breviz : Ebelte is batake - 35 mm- breviz, pulviskaf elpat
  • Jijacek : 140 wexa (2 h 20)
  • Awisa evla : 1924

Elpatusik[betara | va krent betá]

  • Gibson Gowland : John McTeague
  • Zasu Pitts : Trina
  • Jean Hersholt : Marcus
  • Dale Fuller : Maria
  • Tempe Pigott : Gadikya ke McTeague
  • Jack Curtis : Gadikye ke McTeague
  • Silvia Ashton : "Mommer" Sieppe
  • Chester Conklin : "Popper" Sieppe
  • Joan Standing : Selina

Ewavak[betara | va krent betá]


Fliwuca
XANTO
Vergumvelt Greed
Skusik Erich von Stroheim
Stroheim Harcourt 1946.jpg
Ava Englava
Veyaf suterot McTeague (1899), gan Frank Norris
Oxi Tuwavevaf elpat
Evla 1924
Jijacek 140 wexa
betara teza
Nuvola 2.0+ Sculpture.svg  Tuveli icde Yamba  Nuvola 2.0+ Sculpture.svg


Englavafa finta ke elpat