Amidaca wal toloya betara va "Hattusa"

Teliz mal Wikipedia.
Angelalux (prilara | webekseem)
Aucun résumé des modifications
b 18 betaks
( me amidaca )

Siatos ba 31 pereaksat 2020 à 19:11

Tigixo ke Hattusa is yonar Hatti debakap

Debak is debala

Debak ke Hattusa ( re Boğazkale ) valente istefa Anatola, talte Ankara vas 150 km-. Tir mevtavafa gola dem figackafa is re rodapafa lidawicka. Fentugal gitir abrotcif voxen idulugal trelaf. Aname debak ruxeem tir abicaf isen anameda tickir raporapafa. Wori monefa azekexa tid bodafa numen saneliapa roblidar tode kiewon zo tuvodad. Gola tigisa lente Boğazkale tir loloon abdafa darpe vanlanira va bira numen aala tuekamawer.

Boğazkale koe kendapa ke Kızılırmak bost ( Marashantiya koe Hatti klita, i Halys koe pulotafa ellasavafa klita ) tigir. Bak Savsugal kazafa joyapa va debak remoniyid, tulon i tana geulentafa kal Kara Bira. Wori Hattusa wid eze idja ke Hatti seltay loon geeon tigisa dun tiyimir.

Izva ke wid

Zovdom ke Hattusa debak 1. Divefa rebavega 2. Dopewapa 3. Mona ke datca 4. Gazafa berma 5. Koefa rebavega 6. Sarikale 7. Krapol tuvel 8. Krapolik tuvel 9. Yerkapi 10. seg dem dopewa ke ticewid 11. Gazik tuvel 12. Nisantepe 13. Maxa 14. Büyükkaya
Pak ke titewid
Widavegaki ke Hattusa dimvegeduyuni gan rawaopik

Hattusa widap lanugale tiyir kelu ke Hatti gindaxo. Rawaks anton wan zavzad, daykes welmon ice 1.64 km² moe datcaxo is arestaxo, voxen savsavaf wid abrotcon ice 2.4 km- tigiyir.

Kayestatason va lava ke jontika voama titnisa va meftafa datca, Hatti saneik va muvak koe pist al suxayad. Arestafe lae ke debak va vegedusik ta malsavera va beti rovegeduni tawovaki al kevvebar, me trumason va sopura va belaf nudazovdom. Sin va tawilazekos dere al senud enide va azekafa welma loote dadiyid.

Mona tiyid kum tawot is rapor dem azekafa kepaita kum bapla is tawa moe intaf trinkeem. Sinaf koak ape tiyir orikackaf kiren abic dilk tiyid. Yasaxopo ke oluikeem tiyid ageltucafe lamoneme tice pistbria von migexakirafa. Wid va jontika onya isu estuxe isu yorida isu olkxe dere bravayar.

Tawadayik vas lok ke Hatti sanelia tadleyed, voxen irubasik ke Hattusa va aryona exava isu eba ksubeyed. Dere tiyid dolekik is sayakik is susik is yoridik is selasik is vageiasik is vukudiasik is dere tawoldopik is rapornyofasik is rogopik is iyekotnyofasik ikz-.

Pelavon gu gindugal, tegirafi tari aotcesi va sane is gertik is gejik is levetirik koe nudeem ke Hattusa ape tariayar. Tawadayik is onasik pis ta dolera va intyon warzeks va widavik sekayad. Vikiz divstis va teyxo is myelgara ke glotcasik is ijera ke sayakik is iera ke vakol kaik monefa venta mopleweyed ise va tena ke koyara pu dolekik artlapis moe astolam vajayan gu doleks dakteyed.

Volnik ke Hatti saneik domus va Hattusa ton lediliodafa xialara gan trumindeem ke widava ape zo fidwayad. Ontinaf tawotaf migexeem dem vamoeon granafa raporafa rebava va wid abrotcon ice 6 km- koanamayar. Lana elega vas raporkacka vektayad eke enekef worasik rofoliyid da wid gan gulik zo kolnayar. Abrotcaf berlot suxayan levo rebavega noveyer da rojusik ke debak roboleyed.

Tuvel ke wid gan veyadokiraf rasek isu krast zo suyud. Lokiewon videyen tuvel tid telyon ke vageeon ontinaf gabot. Kot gu fetinte balumayane ton gulindafe de zo yunkeyer, i ton vegedura kum granafa is mevexafa elega do lopinafi raporki koe waledarka. Krapolik tuvel tiyir wale toloy krapolik ( vey misrafa vundopa ) isen Krapol tuvel tiyir wale toloy jaktolies snavol djuprowelves div raporafa buraga. Balumaks ke Gazik tuvel tiyir tel lolistaf : dem jotaf gejik trelon krujakiraf is diskis va opafa atsa is plotes va ervokufta. Kudja re rowina moe wirda tir ksudaks ke xanto tigiso koe tcilaxe ke Ankara.

Geef tuvel va belca dem dopewa is lamone is dere yona lomorafa mona vansayad. Titeon ralma yoltkirafa gu « widaki » tice pistbria tigiyir : va gazafa berma dem lupaxa is brivaxo ruldayar. Dopewapa katiteon tigisa va xuta ta jorapa ke Hatti sane ape zanudayar.

Dere rupec

Vuestexa

  • (fr) Kurt Bittel, Les Hittites, Paris, Gallimard, « L’univers des formes », 1976
  • (en) Charles Burney, Historical Dictionary of the Hittites, Lanham, Toronto & Oxford, The Scarecrow Press, « The Historical Dictionaries of Ancient Civilizations and Historical Eras », 2004
  • (en) Trevor Bryce, The Kingdom of the Hittites, 'Oxford University Press, 2005, 554 p. (ISBN 978-0-199-28132-9, OCLC 858780016)
  • (en) Trevor Bryce, Life and Society in the Hittite World, Oxford University Press, 2004
  • (de) Andreas Schachner, Hattuscha : Auf den Spuren der sagenhaften Hauptstadt der Hethiter, Munich, C.H. Beck, 2011

Hattusa
Rawopaf debak
Rawaxo ke titefa widava
DEBALA
Patecta Turka       
Winka Çorum
Maneka  40° 01′ 11" L-, 34° 36′ 55" R-
KIRA
Araya Hatti
  Tuveli icde Izvopa 
Hattusa : Hatti kelu
Tamavafa gadakiewega ke UNESCO
Krapol tuvel getalte wid
DEBALA
Tawavaf seg Taltefa Asia
Patecta Turka       
Winka Çorum
Maneka  40° 01′ 11" L-, 34° 36′ 55" R-
KIRA
Ord Arayaf debak
Ludeem (i) (ii) (iii) (iv)
Debakaf otuk 377
Bendesa ilana 1986 ( 10-eaf frugot )
Welmot {{{welmot}}} km²

Teza:TurkaUNESCOTamavafaGadakiewega